शनिवार, २४ डिसेंबर, २०१६

पुतळे




बक्कळ आहेत
गावागावात, चौकाचौकात,
पुतळे उभारलेले,
चौथऱ्यावर त्यांचा इतिहास
खरडलेले,
काहींच्या नांवाची आहे अजून चलती ,
म्हणून मिळते त्यांना स्नान
दोनेकदा वर्षाकाठी,
हार पडतो गळ्यात, टाळ्यांच्या गजरात
ऐकतात पुतळे मख्खपणे त्याचे महान कार्य
गुगललेले कुणी तरी नेटाने …
एखादा चलनातला पुतळा बघतो
त्याचीच शिकवण पायदळी तुडवत,
पुतळा बाटला असा ओरडा करत
गावाला आग लावत
फिरणाऱ्या त्याच्याच औलादी;
कारण एक कुणी अगतिक
पुतळ्याच्या आसऱ्याला आलेला निराश्रीत
दंडुका पडताच कुल्ल्यावर मध्यरात्री,
आकांताने पळालेला असतो
आपली फाटकी वहाण तिथेच सोडून ….
- श्रीधर जहागिरदार

शनिवार, १९ नोव्हेंबर, २०१६

ही कुणाची याद आहे



ही कुणाची याद आहे 
*******************

फक्त इतका वाद आहे 
घोष की उन्माद आहे  

वाहत्या पाण्यात चित्रे  
काढण्याचा नाद आहे

लागले भांड्यास भांडे 
तो म्हणे संवाद आहे 

फुंकरीने झोम्बणारी 
ही कुणाची याद आहे 

ठेवतो विश्वास भोळा 
हा खरा  बर्बाद आहे
नांव नाही, PAN नाही   
"श्री" तरी आबाद आहे 


- श्रीधर जहागिरदार 
२०-११-२०१६ 

बुधवार, १२ ऑक्टोबर, २०१६

भलती घबाडे




खंगलेली सारीच झाडे 
पोपटांची झाली गिधाडे ... 

तंत्र येथे चाले प्रजेचे
रोज मोर्चे आणीक राडे ... 

टेंडरांनी गिळलेत रस्ते 
खिळखीळी झालीत हाडे.... 

दाखवाया उत्पन्न शेती   
पेरलेली भलती घबाडे !... 

बंगले जे बळकावलेले     
तुंबलेले त्यांचेच भाडे .... 

पांखरांचे येती थवे ना  
पारध्यांच्या कब्जात वाडे ... 

- श्रीधर जहागिरदार 
१२-१०-२०१६

गुरुवार, ६ ऑक्टोबर, २०१६

कोण आले संगतीला



कोण आले संगतीला, 
कोण बसले पंगतीला

गंध नक्की मोगऱ्याचा, 
कोण होते सोबतीला?

प्रेम करुणा दोष झाले, 
परवडेना ऐपतीला 

सावल्यांचे राज्य येता
अंत नाही दुर्गतीला ... 

रोज वाजे द्वेष डंका,
बांसरी जपते मतीला 

पेंगला  वाटे क्षणी त्या
दाद देतो हरकतीला ...

जन्म पुढचा दे हवा तर 
आज मृत्यू शाश्वतीला .. 

-श्रीधर जहागिरदार .

 ६ ऑक्टोबर २०१६ 

रविवार, २५ सप्टेंबर, २०१६

दहशत


सिग्नल पर खड़ा बूढा
हरी बत्ती की प्रतीक्षा में,
नियंत्रण रेखा को सम्मान देता
सहमा सा देख रहा था
बेतहाशा रफ़्तार ज़िन्दगी  की ....

सिग्नल होते ही चल पड़ा
अधिकार भाव से
अपनी नियत रेखा पर
सड़क  पार करने बूढ़ा

कुछ गाडीयाँ फिर भी
होड़ लगाती सी घुसपैठ कर रही थी
उसके चंद पलों की अधिकार रेखा पर...

लड़खड़ाते बूढ़े के डर पर हँस पड़ा
नियंत्रण रेखा पर कब्ज़ा किये बस का चालक...

जमा चुका है
अपनों का दहशतवाद
गहरी जड़े
अंदर तक
बूढ़े की जिंदगी में ....

- श्रीधर जहागिरदार

२३-०९-२०१६

गुरुवार, ११ ऑगस्ट, २०१६

विठू


विठू माझी माऊली
विठू माझी स्माइली
विठू करे गुजगोष्टी
विठू असे फ्रेन्डलिस्टी
विठू झालो कासावीस
धाड आजचे स्टेटस
विठूचा मी पाईक
त्याचे सारे लाईक
एकादशी मेसेज केला सेंट
विठू पटकन दे कमेंट


- श्रीधर जहागिरदार

शुक्रवार, ११ मार्च, २०१६

सेवक


रोज सुबह देखता हूँ 
हाथ में कुदाली लिये
चल पड़ते है 'सेवक' …
उम्मीद जागती है
कुछ नया निर्माण होने जा रहा है ...

सुनाई देती है आवाज, खुदाई की
लगातार …  केवल खुदाई की ...
खुश  हूँ नींव पड़ रही है, निर्माण की
अचानक ..  शोर शराबे के बीच
गड़े मुर्दे  निकल बैठते है,
गर्दन पर इसके उसके
फ़ैल जाती है धूल मिट्टी . ...वर्तमानपर
भविष्य निर्माण का कार्य थम जाता है
कल तक के लिए !
अफ़सोस है
इस बार भी गलत साबित हुआ मैं !
सेवकों के चयन में। ..

- श्रीधर जहागिरदार

बुधवार, २४ फेब्रुवारी, २०१६

खिशात समुद्र भरता येत असेल तरच


खिशात समुद्र भरता येत असेल
तरच ती काडी काडेपेटीवर घासा रे …
उगाच आपले आग लावत फिरायचे उद्योग करू नका
बागेत पाखरेहि असतात, होरपळतात ती
आणि कोमेजतात फुले पहाटेच फुलण्याच्या वेळी !
पाखरे होरपळली कि पडतात भक्ष्य
व्यवस्थेच्या खातीरदारीत, तर
निसटलेल्या काहींची, होतात गिधाडे,
कोमेजलेल्या फुलांना पारजणारी   ….
येउन बसतात ती, बागेतल्या अतिप्राचीन
विस्तीर्ण, महाकाय वृक्षाच्या गार ढोलीत
छातीतला विखार जपत ….
बघतात,
भिडताना माळ्यांच्या टोळ्या
निसर्गदत्त इंद्रधनुष्याच्या रंगातला
फक्त एकेक रंग ओरबाडून,
बागेतील समस्त वृक्षवल्ली, फुले कळ्या
आपल्याच एका रंगात पेटवून काढण्याच्या मिषाने… 

चढवतात हल्ला मग, ढोलीतली गिधाडे टोळ्यांवर,
फुला - पाखरांना वाचवायला
उसळलेल्या आग डोंबात गिधाडे होतात धाराशायी,
होरपळतात पाखरे, कोमेजतात फुले,
होरपळलेली पाखरे, पाहिली आहेत मी
गिधाडे होताना, कोमेजलेल्या फुलांना पारजताना ….
म्हणून
खिशात समुद्र भरता येत असेल
तरच ती काडी काडेपेटीवर घासा रे …
- श्रीधर जहागिरदार

शुक्रवार, १९ फेब्रुवारी, २०१६

पुरावा


दरवेळी असेच होत आले  !

त्याने तिला। एकदाच । एका कोपऱ्यात । तिच्या मनाविरुद्ध । कुठलाही कायदेशीर अधिकार नसताना । वासनेच्या अंधार क्षणी वगैरे … मारून टाकले मनानिशी  !

पुरवता आले नाहीत तिला समाधानी पुरावे,
न्याय मिळवण्यासाठी  ह्या हत्येचे, त्यांना हवे तसे ... 
त्या पुराव्यांचा पाठपुरावा करताना
सारे संभावित तिच्या अंगांगावर
प्रश्नांची नखे रुतवत, मनातल्या मनात
उपभोगत राहिले तिला
आणि  
जगावी लागली तिला ओंगळ सात मिनिटे
मनाविरुद्ध । पुन्हा पुन्हा …। कायदेशीर ठिकाणी . …. । कायदेतज्ञांच्या अखात्यारात। न्याय मिळेल ह्या आशेच्या अंधुक क्षणी ….
तिची बातमी करताना
ते ही  तेच घडवत राहिले, अहोरात्र
घराघरातल्या दिवाणखान्यातून
प्रकाश करून टीवीच्या पडद्यावर
कायद्याचे राज्य पुनर्स्थापित व्हावे ह्यासाठी …

पेटत्या मेणबत्त्या सांगू लागल्या तिला
सोड बाहूलीपण, हो ज्वाला
सबल हो सबल हो स्वबलाने लढ लढा


अखेर
पुढच्या वेळी ते घडताना
तिने एकवटले धाडस
ओरबाडून छाटले त्याचे ताठर शस्त्र
पुन्हा पुन्हा अस्तित्वावरच आघात  करणारे
आणि सरळ ठेवले नेऊन हातात
पुरावे मागणाऱ्यांच्या…

कायद्याच्या हतप्रभ सेवकांनी
तडकाफडकी केला गुन्हा दाखल
हत्येच्या प्रयत्नाचा 
आणि आत्महत्येला प्रवृत्त केल्याचा
तिच्या धाडसाविरोधात !!
*
(नर मादी संघर्षात
पौरुष गमावलेल्या नराने
हिरव्याकंच झाडाला लटकून
आत्महत्या केल्याची बातमी
जाहिरातींच्या चार पानानंतर
तिसऱ्या पानावरच्या तिसऱ्या रकान्यातली
वाचलीत का तुम्ही?)

- श्रीधर जहागिरदार