शनिवार, ३१ जानेवारी, २००९

वादळ

वाचता आली असती तुझ्या
डोळ्यातली वादळं,
तर जपले असते किनारे,
निदान शोधले असते निंवारे
शिडं फाडण्याआधी.



आता आकाशच झुगारल्यावर
चंद्राचं कौतुक सरलय,
सारं आकाशच डोळ्यात
माझ्या थेंब होउन उरलय.



मंगळवार, २७ जानेवारी, २००९

कविता

एक कविता
डोळ्यात तुझ्या तरळलेली
एक गझल
कुंतलात त्या गुंतलेली,

गालावरती
गीत लाजरे लकेर घेई
अधरावरती
झिरपत राहे मस्त रुबाई,

ढळणारी
पदरावरुनी धुंद लावणी
हिरवळणारी
अंगोंअंगी सुरेल गाणी,

मनास वाटे
खुल्या दिलाने सारी गावी
गळ्यात उमटे
परी एक शापित भैरवी.
- श्रीधर 'अनिकेत'