शब्द ओला, आला पाऊस
अर्थ चिंब झाला पाऊस...
****************************
झिंगत पिंगत उनाड सोबत
वारा घेऊन आला पाऊस,
तुझ्या रुपा अभिषेक कराया
छत्री उडवून गेला पाऊस ...
**********************************
गरम चहाच्या कपात टपटप
टपरीखाली 'छत'वाला पाऊस,
'एकछत्र' हो डुलते प्रेमी,
रिझवी त्यांना मतवाला पाऊस...
**********************************
घाटामधली वळणे शोधी,
बोट बिलंदर झाला पाऊस,
गर्द तनुवर झिम झिम बरसे
अधर कलंदर झाला पाऊस ...
*******************************
बरसून बरसून थकला आणि
उन मोकळा झाला पाऊस,
कसा नभावर कमान तोलत
रंग साजिरा झाला
पाऊस ...
***************************
दौरे काढून पळती अंबुद
राजकारणी झाला पाऊस,
कधी हजेरी लावून निव्वळ
भत्ता खातो साला पाऊस ...
*********************************
ढग फुटीचे तांडव नाचत
दहशत पेरून गेला पाऊस
आकाशातील बापा तुमचा
कसा कसाबी झाला पाऊस?
*****************************
- श्रीधर जहागिरदार
*****************************
शब्दांची बुडबुड नुसती
कुणा कवीची कविता पाऊस,
शेतकऱ्याच्या जीवास तगमग,
आस बने की फास हा पाऊस......
*******************************- श्रीधर जहागिरदार
8 मे 2012
कोणत्याही टिप्पण्या नाहीत:
टिप्पणी पोस्ट करा