सरळ वाटही वळते हल्ली,
काम काढणे जमते हल्ली...
कशास करता गद्धे मजुरी
मस्का पालिश फळते हल्ली...
झक्क करावा प्रकल्प सादर
गती कुणी ना पुसते हल्ली..
संध्याकाळी शुभंकरोती ?
जीभ कोरडी पडते हल्ली...
कुत्रे होवुन जावे तेथे
जिथे आंधळे दळते हल्ली...
संघ भावना विचार रुचकर
भिडू पुढे? मळमळते हल्ली...
लज्जा स्त्रीचा खरा दागिना
सहज कुणीही लुटते हल्ली ...
बरे चालले म्हणतो 'श्री', पण
झोप तयाला नसते हल्ली. ..
- श्रीधर जहागिरदार
१६-०९-२०१२
कोणत्याही टिप्पण्या नाहीत:
टिप्पणी पोस्ट करा