शुक्रवार, २६ ऑक्टोबर, २०१२

आज माझ्या वेदनेला




भोवताली पेटलेले वेदनेचे रान हे
आज माझ्या वेदनेला सारले बाजूस मी ...
++++++++++++++++++++++++
आज माझ्या वेदनेला झाकणार नाही
दाटता डोळ्यात अश्रू, लाजणार नाही ...

जीवनाला पाखडूनी घेतले कुणी का ?
दु:ख फेका, सौख्य ठेवा, चालणार नाही...

मी किनारा ठेवतो, तू वादळे तुझी ने
सांगुनी नौकेस ऐसे भागणार नाही...

रोज माझी बाग फुलवी वेगळी कहाणी
फूल मी जुन्या व्यथेचे, माळणार नाही...

कोंडलेल्या हुंदक्यांचे बंड झाले सुरु
सांत्वनाने बेगडी "श्री " हारणार नाही...

- श्रीधर जहागिरदार
२७-१०-२०१२


कोणत्याही टिप्पण्‍या नाहीत:

टिप्पणी पोस्ट करा