गुरुवार, ११ ऑक्टोबर, २०१२

ठाउक नाही....


आलो होतो काय योजुनी, ठाउक नाही
जातो आहें काय जोडुनी, ठाउक नाही....

कशास करता हेवा माझ्या सौभाग्याचा
सोने निघते कसे भाजुनी ! ठाउक नाही ?

तुझे प्रेम जणु कट्यार होती, खूप नशिली
कसे न कळले घाव होउनी, ठाउक नाही...

गाडी, माडी, नोकर, चाकर, भक्कम सारे,
जाती कां मग मुले टाळुनी, ठाउक नाही...

रदबदलीचा धंदा हल्ली तेंजित आहें,
किती घेतले दाम मोजुनी, ठाउक नाही...

वेशी पाशी संन्याशाची घुटमळ झाली,
कोण चालले दिवा लावुनी, ठाउक नाही...

मुक्कामाला जो तो चटकन उतरून गेला
'श्री' कां बसला जागा धरुनी, ठाउक नाही...


- श्रीधर जहागिरदार
११-१०-२०१२



कोणत्याही टिप्पण्‍या नाहीत:

टिप्पणी पोस्ट करा