मंगळवार, २८ ऑगस्ट, २०१२

माझ्या त्या साऱ्या कविता



झाल्या ना अजून लिहुनी, माझ्या त्या साऱ्या कविता,
वस्तीला वाऱ्या मधुनी, माझ्या त्या साऱ्या कविता...

आकाश विलासी झाले बघ  किती कल्पनापक्षी
चोचींत उडाले धरुनी, माझ्या त्या साऱ्या कविता...

शब्दांच्या खोल मनीचे छळतात जरी अर्थ तुला
बघ मनांत असतिल रुतुनी, माझ्या त्या साऱ्या कविता!

मी पेरत गेलो करुणा, शब्दांच्या शेतामधुनी,
शिंपित गेल्या अश्रु  तेंव्हा , माझ्या त्या साऱ्या कविता...

टोळ धाड आलेली, मळभ दाटले भवताली खिन्न,
अंतरास उजळे फिरुनी, माझ्या त्या साऱ्या कविता...

आंजर- गोंजर करत्या खोचक- बोचक नसत्या उक्त्या
वहीतच असत्या पडूनी , माझ्या त्या साऱ्या कविता...

माझ्याच बरोबर असुद्या, ह्या सरणावरती सुद्धा  
वस्तीला वाऱ्या मधुनी, माझ्या त्या साऱ्या कविता...

- श्रीधर जहागिरदार
२८-८-२०१२



कोणत्याही टिप्पण्‍या नाहीत:

टिप्पणी पोस्ट करा