धुके

धुके 
****
वाहवाहीचे उद्गार शमल्यावर 
शांतता झाली आणि
त्याचे लक्ष वेधले
प्रामाणिक प्रश्णचिन्हांनी
कोपऱ्यातील निरागस चेहऱ्यावरच्या

आणि मग तो ही शोधू लागला संदर्भ ,
निपचित पडलेले,
आणि अर्थ विरलेले
विझलेल्या उदबत्तीच्या धुरासारखे,,

अस्फुट धुके तेंव्हा विरले नव्हते
अस्फुट धुके अद्यापही तसेच पसरलेले

- श्रीधर जहागिरदार
७ िडिसेंबर २०१३
१०. ०५ रात्री

सांज

 

 निवांतली वृक्ष राई
स्थिर जळातले बिंब,
येता पांखरे श्रमून
मिळे मायेचा ओथंब …

थंडावले, पसरले
ऊन माळावर आता,
सारंगाचे स्वर साज
जणू निवलेत गाता …

 - श्रीधर जहागिरदार 
१४-११-२०१३
Parramatta,, Sydney,, NSW

तो, ती आणि आकाश

लग्नाआधी दोघेही हातात हात घालून
मोकळ्या आकाशाखाली मुक्त हिंडायचे …

ती ह्याच्या डोळ्यांनी, तो  तिच्या  डोळ्यांनी 

एकच आकाश बघत रंगायचे …

मग दोघांनी ठरवलं

असच किती दिवस फिरायचं ?

वाट बघत बघत तासन तास झुरायचं ?

त्या पेक्षा रहाव, दोघांनी सोबत कायमच…

आकाश मोकळ दिलं सोडून

आणि घेतलं आपल्याला बांधून !

आता ते राहतात कायमचे

एका घरात … 

बघत बसतात 

आपल्या मनात उगवलेल्या
नव्याच भिंतीच्या खिडकीतून

आकाशाचा आपापला तुकडा !

- श्रीधर जहागिरदार

तमाशा

कुठलीशी तिडीकच उठली …

बेमुर्वत बोललो, वागलो,
पहिल्यांदाच 'घेतल्या' नंतर

वागलो होतो तसा,

तेंव्हाही  उठवले होतेत 

प्रश्नचिन्ह माझ्या स्वतंत्र अस्मितेवर, 

अस्तित्वावर, अभिव्यक्तीवर

अन आता पुन्हा तेच …. 

मधल्या काळात मिळवलेले
सारे पोतेऱ्याने पुसून काढून !

  
अन बसलो  मग
कसनुसा होऊन,
आपलीच नख कुरतडत
आपल्याच दातांनी …।

जे मला अभिप्रेत नसते
ते वर्तनात उमटते
तेव्हाच मी पडतो काळा ठिक्कर
माझ्याच दर्पणात,
खंडीत होते माझेच सौदर्य
माझ्याच हातांनी … !

शोधतोय ती गर्दी मघाची
टाळ्या वाजवून मला चिथावणारी,
निघून गेलेली आता
दुसऱ्या तमाशाला
.
.
माझा तमाशा बनवून !

अनकही

मैंने कब कहा
बचाओ मुझे मेरी पीड़ा से,
फिर भी चले आते हो तुम
मुझे सम्हालने...

मै रो भी नहीं पाता
रिश्ते के लिहाज से....

आज फिर एक कविता
अनकही रह गई!!

- श्रीधर जहागिरदार

सुख प्रवासी प्रवासी

सुख प्रवासी प्रवासी
दु:ख असे रहिवासी …

सुख निरंतर शोध
दु:ख शाश्वताचा बोध …

सुख चौकटी कोंडले
दु:ख गगनी मांडले  …

सुख चांदणी आभास
दु:ख तेजाचा दे ध्यास ...

सुख चिमुट चिमूट
दु:ख पसरे मुकाट …

सुख अळवावर थेंब
दु:ख डोळ्यात ओथंब …

सुख स्वत:शी साठव
दु:ख देवाचा आठव …

- श्रीधर जहागिरदार
२८ आगस्ट २०१३

संध्याकाळ - तीन विचार

संध्याकाळ - तीन विचार

१
सुटणे जुळणे घडते जेथे

तिथे उसवते शिवण मनाची

रुखरुख हुरहुर ग्रासून जाते 

होता संध्याकाळ कुणाची …

२

दिवस आजचा गेला, सुटला

दान तयाचे उरले हाती,

तेच घेउनी उडेल रावा

कुण्या दिशेला तोडून नाती …

३

झाली संध्याकाळ पेटवा

पुन्हा नव्याने स्वप्नदिवे,

भेदून कातळ अंधाराचा

मनास फुटू द्या कोंब नवे …

- श्रीधर जहागिरदार
   १-७-२०१३