गुरुवार, २० फेब्रुवारी, २०२०

गजरा


पहाटे
एकमेकासोबत
गरम वाफाळलेला
चहा घोट घोट,
सोबतीला चिवचिवाट
पहाट चोचीत घेऊन
दिवसाला कवेत घ्यायला
निघायच्या तयारीत असणाऱ्या पाखरांचा ….

संध्याकाळी
थकल्या प्रतीक्षेला माळावा गजरा
मंद गंध मोगऱ्याचा
आणि करावे - व्हावे टवटवीत
असे काहीसे असायचे मनात ….

राहूनच गेले सारे
अधिक महत्वाच्या
ऐहिक सुखांच्या शोधात

- श्रीधर जहागिरदार

मंगळवार, १८ फेब्रुवारी, २०२०

अटॅक

अटॅक कधीही यायचा
मग आवडती पुस्तके
टिपण वह्या
कविता
मित्रांमध्ये वाटून द्यायचा ...

एकदा तर
एक कविताच
एका मित्राचं नांव लिहून
त्याला दिलेली.
दोघांचं भलं झालं.

आता
पुस्तके नावडती झालीत
वह्या कोरड्या पडल्यात
कविता हरवल्यात

आता अटॅक आला तर
चौकटीतून डोकावणाऱ्या
मित्रांना सांगणार
मलाच चौकटीत ओढून घ्या ...

- श्रीधर जहागिरदार
१८-०२-२०२०